ބުނެވިދިޔަ ޤާނޫނުގެ 4 ވަނަ މާއްދާގެ އަރިމަތީ ސުރުޚީ އަދި އެ މާއްދާގެ (ހ) އަންނަނިވި ގޮތަށް އިޞްލާޙުކުރުން.

1. ބުނެވިދިޔަ ޤާނޫނުގެ 4 ވަނަ މާއްދާގެ އަރިމަތީ ސުރުޚީ އަދި އެ މާއްދާގެ (ހ) އަންނަނިވި ގޮތަށް އިޞްލާޙުކުރުން.

4. މީރާގެ ބޯޑު

(ހ) މީރާގެ ހިންގުމުގެ ސިޔާސަތުތައް ކަނޑައެޅުމަށާއި، މި ޤާނޫނުން ކަނޑައަޅާ އެންމެހައި މަސްއޫލިއްޔަތުތައް އަދާކުރުމަށް، މި ޤާނޫނުގައިވާ ގޮތުގެމަތިން ޢައްޔަންކުރެވޭ ބޯޑެއް އޮންނަންވާނެއެވެ.

2. ބުނެވިދިޔަ ޤާނޫނުގެ 4 ވަނަ މާއްދާގެ (ށ) އަންނަނިވި ގޮތަށް އިޞްލާޙުކުރުން.

4. (ށ) މީރާގެ ބޯޑުގެ މަސްއޫލިއްޔަތުތަކުގެ ތެރޭގައި އަންނަނިވި ކަންކަން ހިމެނެއެވެ.

(1) ޓެކްސް ޤާނޫނުތަކުގެ ދަށުން ހަދަންޖެހޭ ގަވާއިދުތައް ހެދުން؛

(2) ކޮމިޝަނަރ ޖެނެރަލް އޮފް ޓެކްސޭޝަންއާއި، މީރާގެ އެންމެހައި މުވައްޒަފުންގެ މިލްކިއްޔާތާބެހޭ މަޢުލޫމާތު ދިރާސާކުރުމާއި، އެކަމަށް ބޭނުންވާ ގަވާއިދުތައް ހެދުން؛

(3) ޓެކްސް ނެގުމާ ގުޅޭގޮތުން މިނިސްޓަރު ކަނޑައަޅާ ސިޔާސަތުތައް މީރާއިން ތަންފީޒުކުރޭތޯ ބެލުމާއި، މީރާގެ މަޤްޞަދުތައް ޙާޞިލުކުރުމަށް އަޅަންޖެހޭ ފިޔަވަޅުތަކާބެހޭ ގޮތުން މިނިސްޓަރަށް ލަފާ ދިނުން؛

(4) މީރާގެ އިދާރީ ކަންކަން ހިންގުމުގައި ކޮމިޝަނަރ ޖެނެރަލް އޮފް ޓެކްސޭޝަން ބޭނުންވެއްޖެ ހިނދެއްގައި، ކޮމިޝަނަރ ޖެނެރަލް އޮފް ޓެކްސޭޝަންއަށް ލަފާދިނުން؛

(5) ކޮމިޝަނަރ ޖެނެރަލް އޮފް ޓެކްސޭޝަންއާއި، ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންއާއި މީރާގެ މުވައްޒަފުން ޢަމަލުކުރަންޖެހޭ ސުލޫކީ މިންގަނޑު ކަނޑައެޅުން.

3. ބުނެވިދިޔަ ޤާނޫނުގެ 4 ވަނަ މާއްދާގެ (ރ) އަންނަނިވި ގޮތަށް އިޞްލާޙުކުރުން.

4. (ރ) މީރާގެ ބޯޑު އެކުލެވިގެންވަނީ އަންނަނިވި 7 (ހަތެއް) މެންބަރުންގެ މައްޗަށެވެ.

(1) ދައުލަތުގެ މާލިއްޔަތުގެ ކަންކަން ބެލެހެއްޓުމުގެ މަސްއޫލިއްޔަތު ޙަވާލުކޮށްފައިވާ ވުޒާރާގައި ޓެކުހާބެހޭ ސިޔާސަތުތަކާގުޅޭ ކަންކަން ބެލެހެއްޓުމަށް މިނިސްޓަރު ކަނޑައަޅާފައިވާ ފަރާތް؛

(2) ރައީސުލްޖުމްހޫރިއްޔާ ޢައްޔަންކުރާ 5 (ފަހެއް) މެންބަރުން؛

(3) ކޮމިޝަނަރ ޖެނެރަލް އޮފް ޓެކްސޭޝަން.

4. ބުނެވިދިޔަ ޤާނޫނުގެ 4 ވަނަ މާއްދާގެ (ބ) އަންނަނިވި ގޮތަށް އިޞްލާޙުކުރުން.

4. (ބ) 

(1) މި މާއްދާގެ (ރ) ގެ (1) ވަނަ ނަންބަރުގައި ބަޔާންކުރާ މެންބަރު ޢައްޔަންކުރާނީ ރައީސުލްޖުމްހޫރިއްޔާއެވެ.

(2) މި މާއްދާގެ (ރ) ގެ (2) ވަނަ ނަންބަރުގައި ބަޔާންކުރާ މެންބަރުން ޢައްޔަންކުރާނީ، ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ. މިގޮތުން، ރައީސުލްޖުމްހޫރިއްޔާ ބޯޑުގެ މެންބަރުން ޢައްޔަންކުރަންވާނީ، ޢާންމުކޮށް އިޢުލާނުކުރުމުން، ބޯޑުގެ މެންބަރުކަމަށް އެދި ހުށަހަޅާ އެންމެހައި ފަރާތްތައް ދިރާސާކޮށް، އެ ދިރާސާގެ ނަތީޖާއަށް ބަލައި، ނަންތައް ތަރުތީބުކޮށް، އެ ތަރުތީބުން ރައްޔިތުންގެ މަޖިލީހަށް ފޮނުވުމުން، ރައްޔިތުންގެ މަޖިލީހުން ރުހުންދޭ ބައެކެވެ. މިގޮތުން، ނަން ފޮނުވުމުގައި ބޯޑަށް މެންބަރުން ބޭނުންވާ ޢަދަދަށްވުރެ އިތުރަށް ނަން ފޮނުވަންވާނެއެވެ. ބޯޑުގެ މެންބަރުކަމަށް އެދި ހުށަހަޅާފައިވާ ފަރާތްތައް، ބޯޑަށް ބޭނުންވާ މެންބަރުންގެ ޢަދަދަށްވުރެ މަދުނަމަ، ބޯޑުގެ މެންބަރުކަމަށް އެދި ހުށަހަޅާ އެންމެހައި ފަރާތްތަކުގެ ނަންތައް ރައްޔިތުންގެ މަޖިލީހަށް ފޮނުވަންވާނެއެވެ.

5. ބުނެވިދިޔަ ޤާނޫނުގެ 4 ވަނަ މާއްދާގެ (ޅ) ގެ (10) ވަނަ ނަންބަރު އަންނަނިވި ގޮތަށް އިޞްލާޙުކުރުން.

4. (ޅ) (10) ސަރުކާރު ޤަބޫލުކުރާ އިދާރާއަކުން ޓެކްސް، އިޤްތިޞާދު، މާލީ، އެކައުންޓިންގ، ވިޔަފާރި ނުވަތަ ޤާނޫނީ ދާއިރާއިން މާސްޓަރސް ޑިގްރީއެއް ނުވަތަ އެއާ އެއް ފެންވަރުގެ ސަނަދެއް ޙާޞިލުކޮށްފައިވުން، ނުވަތަ އެއިން ދާއިރާއަކުން ފުރަތަމަ ޑިގްރީ ނުވަތަ އެއާ އެއް ފެންވަރުގެ ސަނަދެއް ޙާޞިލުކުރުމަށްފަހު އެ ދާއިރާއެއްގައި މަސައްކަތްކޮށް، މަދުވެގެން 5 (ފަހެއް) އަހަރު ދުވަހުގެ ތަޖުރިބާ ލިބިފައިވުން.

6. ބުނެވިދިޔަ ޤާނޫނުގެ 4 ވަނަ މާއްދާގެ (ޅ) ގެ ފަހަތަށް އަންނަނިވި ފަދައިން އަކުރެއް އިތުރުކުރުން.

4. (1-ޅ) ކޮމިޝަނަރ ޖެނެރަލް އޮފް ޓެކްސޭޝަން ބޯޑުގައި ހިމެނޭނީ ވޯޓު ނުދެވޭ މެންބަރެއްގެ ގޮތުގައެވެ.

7. ބުނެވިދިޔަ ޤާނޫނުގެ 4 ވަނަ މާއްދާގެ (އ) އަންނަނިވި ގޮތަށް އިޞްލާޙުކުރުން.

4. (އ) ބޯޑުގެ ޗެއަރޕަރސަންއަކީ މި މާއްދާގެ (ރ) ގެ (1) ވަނަ ނަންބަރުގައި ބަޔާންކުރާ ފަރާތެވެ. ބޯޑުގެ ޑެޕިއުޓީ ޗެއަރޕަރސަންއަކީ މި މާއްދާގެ (ރ) ގެ (2) ވަނަ ނަންބަރުގައި ބަޔާންކޮށްފައިވާ މެންބަރުންގެ ތެރެއިން ބޯޑުން ޢައްޔަންކުރާ މީހެކެވެ.

8. ބުނެވިދިޔަ ޤާނޫނުގެ 5 ވަނަ މާއްދާ އަންނަނިވި ގޮތަށް އިޞްލާޙުކުރުން.

5. ބޯޑުގެ މެންބަރުން ވަކިކުރުމާއި އިސްތިޢުފާ ދިނުން

(ހ) މީރާގެ ބޯޑުގައި ހިމެނޭ މެންބަރަކަށް އަންނަނިވި ޙާލަތްތަކުގެ ތެރެއިން ޙާލަތެއް މެދުވެރިވެއްޖެނަމަ، މީރާގެ ބޯޑުގެ މެންބަރުކަމުން ވަކިވާނެއެވެ.

(1) ޝަރުޢީ ޙުކުމަކުން އިފްލާސްކުރުން؛ ނުވަތަ

(2) ޖިނާއީ ކުށެއް ކުރިކަން ޝަރުޢީ ކޯޓަކަށް ސާބިތުވެ ޙުކުމްކުރުން؛ ނުވަތަ

(3) މެންބަރެއްގައި ހުރުމަށް މި ޤާނޫނު ލާޒިމްކުރާ ސިފައެއް އުނިވުން.

(ށ) މި މާއްދާގެ (ހ) ގައި ބަޔާންކޮށްފައިވާ ޙާލަތެއް މެދުވެރިނުވިނަމަވެސް، ބޯޑު މެންބަރުންގެ ތެރެއިން މެންބަރަކު އޭނާގެ މަޤާމުގެ މަސްއޫލިއްޔަތުތައް އަދާކުރުމުގައި އިހުމާލުވިކަމަށް، ނުވަތަ މަޤާމުގެ ނުފޫޒު ނާޖާއިޒް ގޮތުގައި ބޭނުންކުރާކަމަށް ރައްޔިތުންގެ މަޖިލީހުގެ މީރާގެ ކަންކަން ބެލުމުގެ މަސްއޫލިއްޔަތު ޙަވާލުކޮށްފައިވާ ކޮމިޓީއަށް ފެނިގެން، އެ މެންބަރަކު މަޤާމުން ވަކިކުރުމަށް ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވާ މެންބަރުންގެ އަޣުލަބިއްޔަތުން ފާސްކުރުމުން އެ މެންބަރަކު މެންބަރުކަމުން ވަކިވާނެއެވެ.

(ނ) ބޯޑުގެ މެންބަރަކު އަމިއްލައަށް ވަކިވާން ބޭނުންވެއްޖެނަމަ، ސިޓީއަކުން އެކަން ބަޔާންކޮށް ރައީސުލްޖުމްހޫރިއްޔާއަށް ހުށަހަޅައި، އެ ސިޓީ ރައީސުލްޖުމްހޫރިއްޔާއަށް ލިބުމުން، އެ މެންބަރަކު މަޤާމުން ވަކިވީއެވެ.

(ރ) ބޯޑުގެ މެންބަރަކު އެއްވެސް ސަބަބަކާހުރެ އެ މެންބަރަކު ޢައްޔަންކޮށްފައިވާ މުއްދަތު ހަމަވުމުގެ ކުރިން އެ މަޤާމުން ވަކިވެއްޖެނަމަ، ގިނަވެގެން 45 (ސާޅީސްފަހެއް) ދުވަހުގެ ތެރޭގައި އެ ހުސްވި މަޤާމަށް މީހަކު ޢައްޔަންކުރަންވާނެއެވެ.

9. ބުނެވިދިޔަ ޤާނޫނުގެ 7 ވަނަ މާއްދާގެ (ރ) އަންނަނިވި ގޮތަށް އިޞްލާޙުކުރުން.

7. (ރ) ބޯޑުން ކަމެއް ފާސްކުރުމަށް ވޯޓު ދިނުމުގައި ބޯޑުގެ ޗެއަރޕަރސަންއަށް ވޯޓު ދެވޭނީ އެ ކަމެއްގައި ދެކޮޅަށް ލިބޭ ވޯޓު އެއްވަރުވެއްޖެ ހިނދެއްގައި އެކަންޏެވެ. ބޯޑުން ފާސްކުރާ ކޮންމެ ކަމެއްގައިވެސް ކޮންމެ މެންބަރަކު ވޯޓު ދިން ގޮތް ވަކިވަކިން ޔައުމިއްޔާއިން އެނގެން އޮންނަންވާނެއެވެ.

10. ބުނެވިދިޔަ ޤާނޫނުގެ 7 ވަނަ މާއްދާގެ (ބ) އަންނަނިވި ގޮތަށް އިޞްލާޙުކުރުން.

7. (ބ) ބޯޑުގެ އިދާރީ ކަންކަން ބަލަހައްޓާނީ ދައުލަތުގެ މާލިއްޔަތާބެހޭ ކަންކަން ބެލެހެއްޓުމުގެ މަސްއޫލިއްޔަތު ޙަވާލުކުރެވިފައިވާ ސަރުކާރުގެ ވުޒާރާއިންނެވެ.

11. ބުނެވިދިޔަ ޤާނޫނުގެ 8 ވަނަ މާއްދާގެ އަރިމަތީ ސުރުޚީ އަދި އެ މާއްދާގެ (ހ) އަންނަނިވި ގޮތަށް އިޞްލާޙުކުރުން.

8. ކޮމިޝަނަރ ޖެނެރަލް އޮފް ޓެކްސޭޝަން އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ޢައްޔަންކުރުމާއި ވަކިކުރުމާއި މުސާރަ ކަނޑައެޅުން

(ހ) ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ޢައްޔަންކުރާނީ، ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ. މިގޮތުން ރައީސުލްޖުމްހޫރިއްޔާ ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ޢައްޔަންކުރަންވާނީ، ޢާންމުކޮށް އިޢުލާނުކުރުމުން، އެ ދެ މަޤާމަށް އެދި ހުށަހަޅާ އެންމެހައި ފަރާތްތައް ދިރާސާކޮށް، އެ ދިރާސާގެ ނަތީޖާއަށް ބަލައި، ނަންތައް ތަރުތީބުކޮށް، އެ ތަރުތީބުން ރައްޔިތުންގެ މަޖިލީހަށް ފޮނުވުމުން، ރައްޔިތުންގެ މަޖިލީހުން ރުހުންދޭ ބައެކެވެ. މިގޮތުން ނަން ފޮނުވުމުގައި އެ ދެ މަޤާމަށް ބޭނުންވާ ޢަދަދަށްވުރެ އިތުރަށް ނަން ފޮނުވަންވާނެއެވެ.

12. ބުނެވިދިޔަ ޤާނޫނުގެ 8 ވަނަ މާއްދާގެ (ށ) އަންނަނިވި ގޮތަށް އިޞްލާޙުކުރުން.

8. (ށ) ކޮމިޝަނަރ ޖެނެރަލް އޮފް ޓެކްސޭޝަން ނުވަތަ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އޭނާގެ މަޤާމުގެ މަސްއޫލިއްޔަތުތައް އަދާކުރުމުގައި އިހުމާލުވިކަމަށް، ނުވަތަ މަޤާމުގެ ނުފޫޒު ނާޖާއިޒް ގޮތުގައި ބޭނުންކުރާކަމަށް، ނުވަތަ ބޯޑުން ފާސްކޮށްފައިވާ ސުލޫކީ މިންގަނޑާ ޚިލާފުވެފައިވާ ކަމަށް ރައްޔިތުންގެ މަޖިލީހުގެ މީރާގެ ކަންކަން ބެލުމުގެ މަސްއޫލިއްޔަތު ޙަވާލުކޮށްފައިވާ ކޮމިޓީއަށް ފެނިގެން، ކޮމިޝަނަރ ޖެނެރަލް އޮފް ޓެކްސޭޝަން ނުވަތަ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން މަޤާމުން ވަކިކުރުމަށް، ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވާ މެންބަރުންގެ އަޣުލަބިއްޔަތުން ފާސްކުރުމުން އޭނާ އެ މަޤާމުން ވަކިވާނެއެވެ.

13. ބުނެވިދިޔަ ޤާނޫނުގެ 8 ވަނަ މާއްދާގެ (ބ) އަންނަނިވި ގޮތަށް އިޞްލާޙުކުރުން.

8. (ބ) ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން މަޤާމުން އަމިއްލައަށް ވަކިވާން ބޭނުންވެއްޖެނަމަ، ސިޓީއަކުން އެކަން ބަޔާންކޮށް ރައީސުލްޖުމްހޫރިއްޔާއަށް ހުށަހަޅައި، އެ ސިޓީ ރައީސުލްޖުމްހޫރިއްޔާއަށް ލިބުމުން މަޤާމުން ވަކިވީއެވެ.

14. ބުނެވިދިޔަ ޤާނޫނުގެ 8 ވަނަ މާއްދާގެ (ޅ) އަންނަނިވި ގޮތަށް އިޞްލާޙުކުރުން.

8. (ޅ) ކޮމިޝަނަރ ޖެނެރަލް އޮފް ޓެކްސޭޝަން ނުވަތަ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމު، އެއްވެސް ސަބަބަކާހުރެ ހުސްވެއްޖެނަމަ، ގިނަވެގެން 45 (ސާޅީސްފަހެއް) ދުވަހުގެ ތެރޭގައި އެ މަޤާމަށް މީހަކު ޢައްޔަންކުރަންވާނެއެވެ.

15. ބުނެވިދިޔަ ޤާނޫނުގެ 8 ވަނަ މާއްދާގެ (ޅ) ގެ ފަހަތަށް އަންނަނިވި ފަދައިން ދެ އަކުރު އިތުރުކުރުން.

8.

(ކ) ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ޢައްޔަންކުރެވޭ މީހެއްގެ މަޤާމުގެ މުއްދަތަކީ، އެ މަޤާމަށް އޭނާ ޢައްޔަންކުރެވޭ ތާރީޚުން ފެށިގެން 5 (ފަހެއް) އަހަރު ދުވަހެވެ. އެހެންނަމަވެސް، މި މާއްދާގެ (ށ) ގެ ދަށުން މަޤާމުން ވަކިކުރެވޭ ޙާލަތުގައި ފިޔަވައި، ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ޢައްޔަންކޮށްފައިވާ މީހަކު އިތުރު ދައުރަކަށް ޢައްޔަންކުރުމަކަށް މި ޤާނޫނު ހުރަހެއް ނާޅައެވެ.

(އ) މި ޤާނޫނުގެ ދަށުން ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ޢައްޔަންކޮށްފައިވާ މީހަކު ޢައްޔަންކުރެވޭނީ ގިނަވެގެން 5 (ފަހެއް) އަހަރުގެ ދެ ދައުރަށެވެ.

16. ބުނެވިދިޔަ ޤާނޫނުގެ 10 ވަނަ މާއްދާގެ ފަހަތަށް އަންނަނިވި މާއްދާ އިތުރުކުރުން.

10-1. މުދަލާއި ފައިސާގެ ބަޔާން ހުށަހެޅުން

(ހ) މި ޤާނޫނުގެ 4 ވަނަ މާއްދާގެ (ރ) ގެ ދަށުން ޢައްޔަންކުރެވޭ ބޯޑުގެ މެންބަރުންނާއި، ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން، މަޤާމާ ޙަވާލުވުމުގެ ކުރިއަށް ފާއިތުވި އަހަރުގެ، އަދި އެއިން ފަރާތެއް މަޤާމުން ވަކިވާތާ 1 (އެކެއް) އަހަރު ދުވަސް ހަމަވުމާ ހަމައަށް، އަހަރަކު އެއް ފަހަރު، އެ ފަރާތުގެ މިލްކިއްޔާތުގައިވާ މުދަލާއި ފައިސާގެ ހިސާބުތަކާއި، ވިޔަފާރީގެ މަޞްލަޙަތުތަކާއި، އަރަންޏާއި ދަރަނި ހާމަކޮށް އޮޑިޓަރ ޖެނެރަލް ކަނޑައަޅާ ގޮތަކަށް ތައްޔާރުކުރާ ބަޔާނެއް އޮޑިޓަރ ޖެނެރަލަށް ހުށަހަޅަންވާނެއެވެ. އަދި އެގޮތުން ހުށަހަޅާ ބަޔާން، މީރާގެ ވެބްސައިޓްގައި ޝާއިޢުކުރަންވާނެއެވެ.

(ށ) މި މާއްދާގެ (ހ) ގައި ބަޔާންކޮށްފައިވާ ގޮތުގެމަތިން އަހަރަކު އެއް ފަހަރު ހުށަހަޅާ ބަޔާން ހުށަހަޅާނީ، ފާއިތުވި އަހަރަށް ނިސްބަތްވާ މަޢުލޫމާތު ހިމަނައި، އެ އަހަރެއްގެ މާރިޗު މަހުގެ 31 ވަނަ ދުވަހުގެ ކުރިންނެވެ.

(ނ) މި މާއްދާގެ ދަށުން ހުށަހަޅާ ބަޔާން ދިރާސާކޮށް، އެ ބަޔާނާ ގުޅިގެން އޮޑިޓަރ ޖެނެރަލަށް ފާހަގަކުރެވޭ ކަންތައްތަކުގެ މައްޗަށް ބިނާކޮށް ތައްޔާރުކުރާ ރިޕޯޓެއް، ރައްޔިތުންގެ މަޖިލީހުގެ ކަމާބެހޭ ކޮމިޓީއަށް އޮޑިޓަރ ޖެނެރަލް ހުށަހަޅަންވާނެއެވެ.

17. ބުނެވިދިޔަ ޤާނޫނުގެ 15 ވަނަ މާއްދާގެ (ހ) އަންނަނިވި ގޮތަށް އިޞްލާޙުކުރުން.

15. ސިއްރު ހިފެހެއްޓުން

(ހ) ޓެކްސް ޤާނޫނެއްގެ ދަށުން ތައްޔާރުކޮށްފައިވާ އެއްވެސް ލިޔުމަކީ، ނުވަތަ ޓެކްސް ނެގުމުގެ މަސައްކަތުގެ ތެރޭގައި ލިބޭ ނުވަތަ ހޯދާ ޓެކްސް ދައްކާ ފަރާތާބެހޭ އެއްވެސް މަޢުލޫމާތަކީ، ނުވަތަ މި ޤާނޫނުގެ 51 ވަނަ މާއްދާގެ ދަށުން ނުވަތަ މި ޤާނޫނުގެ 1-51 ވަނަ މާއްދާގެ ދަށުން ވެފައިވާ އެއްބަސްވުމެއްގެ ދަށުން ހޯދާ މަޢުލޫމާތަކީ، ސިއްރު މަޢުލޫމާތެވެ. އަދި އެފަދަ މަޢުލޫމާތު، މީރާގެ އެއްވެސް މުވައްޒަފަކު ހާމަކޮށްގެންނުވާނެއެވެ.

18. ބުނެވިދިޔަ ޤާނޫނުގެ 16 ވަނަ މާއްދާގެ (ހ) އަންނަނިވި ގޮތަށް އިޞްލާޙުކުރުން.

16. މަޢުލޫމާތު ހާމަކުރުން

(ހ) މި ޤާނޫނުގެ 51 ވަނަ މާއްދާގެ ދަށުން ނުވަތަ މި ޤާނޫނުގެ 1-51 ވަނަ މާއްދާގެ ދަށުން ވެވޭ އެއްބަސްވުމެއްގައި ހިމެނޭ މަޢުލޫމާތު ދައުލަތުގެ ކަމާބެހޭ ފަރާތަކަށް ހާމަކުރުމަކީ ނުވަތަ އެފަދަ އެއްބަސްވުމެއްގެ ދަށުން މަޢުލޫމާތު ބަދަލުކުރުމަށް ކަނޑައެޅިފައިވާ ނިޒާމުގެ ތެރެއިން ބަދަލުކުރުމަކީ މި ޤާނޫނުގެ 15 ވަނަ މާއްދާގެ ބޭނުމަށްޓަކައި ސިއްރު މަޢުލޫމާތު ހާމަކުރުން ކަމުގައެއް ނުބެލެވޭނެއެވެ.

19. ބުނެވިދިޔަ ޤާނޫނުގެ 30 ވަނަ މާއްދާގެ (ނ) ގެ ފަހަތަށް އަންނަނިވި ގޮތަށް އަކުރެއް އިތުރުކުރުން.

30. (1-ނ) މި މާއްދާގެ (ށ) ގައި އެހެން ބަޔާންކޮށްފައިވީނަމަވެސް، ޓެކްސް ދެއްކުމުގައި މަކަރާއި ހީލަތް ހެދުމުގެ ކުށެއް ނުވަތަ ގަސްތުގައި ޓެކްސް ދެއްކުމުން އެއްކިބާވުމުގެ ކުށެއް ކޮށްފިކަމަށް ޝައްކުކުރެވޭނަމަ، މި މާއްދާގެ (ށ) ގައި ބަޔާންކޮށްފައިވާ ތާރީޚުތަކުން ފެށިގެން 3 (ތިނެއް) އަހަރު ދުވަހުގެ ތެރޭގައި، ޓެކްސްގެ މިންވަރު ކަނޑައެޅުމަށް ބޭނުންވާ ހިސާބުތަކާއި ލިޔެކިޔުންތައް ބަލާކަން އަންގާ އެންގުން މީރާއަށް ފޮނުވިދާނެއެވެ.

20. ބުނެވިދިޔަ ޤާނޫނުގެ 31 ވަނަ މާއްދާގެ (ނ) އިން ފެށިގެން (ޅ) ގެ ނިޔަލަށް ހުރި އަކުރުތައް އުނިކުރުން.

31.

(ނ) (އުނިކުރެވިފައި)

(ރ) (އުނިކުރެވިފައި)

(ބ) (އުނިކުރެވިފައި)

(ޅ) (އުނިކުރެވިފައި)

21. ބުނެވިދިޔަ ޤާނޫނުގެ 31 ވަނަ މާއްދާގެ (މ) ގެ ފަހަތަށް އަންނަނިވި ގޮތަށް ދެ އަކުރު އިތުރުކުރުން.

31. (ފ) ދިވެހިރާއްޖޭގައި ވަޒަންވެރިވެފައިވާ މަލްޓިނޭޝަނަލް ކުންފުނިތަކުގެ ޕޭރަންޓް އެންޓިޓީ ނުވަތަ މައި ކުންފުނިން، އެ ކުންފުންޏާއި އެ ކުންފުންޏާ ގުޅުންހުރި ކުންފުނިތަކުގެ ވިޔަފާރި މުޢާމަލާތްތަކާއި ކުންފުނި ހިންގުމާގުޅޭ މަޢުލޫމާތު ނުވަތަ ކަންޓްރީ-ބައި-ކަންޓްރީ ރިޕޯޓު، މި ޤާނޫނުގެ ދަށުން ހަދާ ގަވާއިދުގައި ބަޔާންކޮށްފައިވާ އުސޫލުތަކާ އެއްގޮތަށް މީރާއަށް ފޯރުކޮށްދިނުމަށް އެންގިދާނެއެވެ.
(ދ) މި މާއްދާގެ (ފ) ގައި ބަޔާންކުރާ ފަދަ ކަންޓްރީ-ބައި-ކަންޓްރީ ރިޕޯޓުތައް މީރާއިން ހޯދި ކަމުގައިވީނަމަވެސް، އެފަދަ ރިޕޯޓުތައް، ބޭރު ޤައުމުތަކާ ޙިއްޞާކުރަންވާނީ،  މި ޤާނޫނުގެ 1-51 ވަނަ މާއްދާގެ ދަށުން ވެފައިވާ އެއްބަސްވުންތަކާ އެއްގޮތްވާ ގޮތުގެމަތިންނެވެ.

22. ބުނެވިދިޔަ ޤާނޫނުގެ 32 ވަނަ މާއްދާގެ (ރ) ގެ ފަހަތަށް އަންނަނިވި ގޮތަށް އަކުރެއް އިތުރުކުރުން.

32. (ބ) މި މާއްދާގެ (ހ) އިން ފެށިގެން (ރ) ގެ ނިޔަލަށް ހުރި އަކުރުތަކުގައި އެފަދައިން ބަޔާންކޮށްފައިވީނަމަވެސް، މި ޤާނޫނުގެ 51 ވަނަ މާއްދާގައި ނުވަތަ މި ޤާނޫނުގެ 1-51 ވަނަ މާއްދާގައި ބަޔާންކޮށްފައިވާ ފަދަ އެއްބަސްވުމެއްގެ ދަށުން ހޯދަން ބޭނުންވާ މަޢުލޫމާތު، އެ ފަރާތެއްގެ އަތުގައި ހުރެދާނެކަމަށް ބެލެވޭ ކޮންމެ ފަރާތަކަށް، 30 (ތިރީސް) ދުވަހުގެ ތެރޭގައި އެ މަޢުލޫމާތު މި ޤާނޫނުގެ ދަށުން ހަދާ ގަވާއިދުގައި ބަޔާންކޮށްފައިވާ ގޮތުގެމަތިން މީރާއަށް ފޯރުކޮށްދިނުމަށް އެންގިދާނެއެވެ.

23. ބުނެވިދިޔަ ޤާނޫނުގެ 39 ވަނަ މާއްދާ އަންނަނިވި ގޮތަށް އިޞްލާޙުކުރުން.

39. މީރާއިން ޓެކްސްގެ ޢަދަދު ކަނޑައެޅުން

(ހ) މީރާއިން ޓެކްސް ދައްކާ ފަރާތެއްގެ ހިސާބުތަކާއި ލިޔެކިޔުންތައް އޮޑިޓްކުރުމަށްފަހު، ނުވަތަ ތަޙްޤީޤެއް ހިންގުމަށްފަހު، އެކަމުގައި ފާހަގަކުރެވުނު ނުކުތާތަކުގެ މައްޗަށް ބިނާކޮށް، އެ ފަރާތުން އެ މުއްދަތުގައި ދައްކަންޖެހޭ ޓެކްސްގެ ޢަދަދު މީރާއަށް ކަނޑައެޅިދާނެއެވެ. އެގޮތުން ކަނޑައަޅާ ކަނޑައެޅުމަށް މި ޤާނޫނުގައި ޙަވާލާދޭނީ "މީރާއިން ކަނޑައަޅާ ޢަދަދު" މިފަދައިންނެވެ.

(ށ) މީރާއިން ކަނޑައަޅާ ޢަދަދު، މި މާއްދާގެ (ހ) ގެ ދަށުން ކަނޑައަޅައިފި ހިނދެއްގައި، އެކަން، އެ ކަނޑައެޅުން ނިސްބަތްވާ ފަރާތަށް ލިޔުމުން އަންގަންވާނެއެވެ. އަދި އެ އެންގުމުގައި އަންނަނިވި ކަންކަން ހިމަނަންވާނެއެވެ.

(1) ޓެކްސް ދައްކާ ފަރާތުގެ ނަމާއި އެޑްރެހާއި ޓެކްސްޕޭޔަރ އައިޑެންޓިފިކޭޝަން ނަންބަރު ("ޓިން")؛

(2) އެ ކަނޑައެޅުން ނިސްބަތްވާ ޓެކްސް ނެގޭ މުއްދަތު؛

(3) އެ ފަރާތުން ޓެކްސްގެ ގޮތުގައި ދައްކަންޖެހޭ ކަމަށް މީރާއިން ކަނޑައެޅި ޢަދަދު، އަދި އެ ޢަދަދު ހިސާބުކުރުމަށް މީރާއިން ބޭނުންކުރި އަސާސްތަކާއި އެ ހިސާބުކުރުމުގެ ތަފްޞީލު؛

(4) އެ ފަރާތަކުން ފައިސާ ދައްކަންޖެހޭ ތާރީޚު.

(ނ) މި މާއްދާގެ (ހ) ގެ ދަށުން މީރާއިން ކަނޑައަޅާ ޢަދަދަކީ ޓެކްސް ދައްކާ ފަރާތުން އެ މުއްދަތަކަށް ކަނޑައަޅާފައިވާ ޓެކްސްގެ ޢަދަދަށްވުރެ ބޮޑު ޢަދަދެއްނަމަ، މީރާއަށް އެފަދަ ޢަދަދެއް ކަނޑައެޅޭނީ، މި ޤާނޫނުގެ 30 ވަނަ މާއްދާގެ (ހ) ގައި ބަޔާންކޮށްފައިވާ އެންގުން ފޮނުވާ ތާރީޚުން ފެށިގެން 2 (ދޭއް) އަހަރު ދުވަސް ފާއިތުވުމުގެ ކުރިންނެވެ.

(ރ) މި މާއްދާގެ (ނ) ގައި ބަޔާންކޮށްފައިވާ މުއްދަތުގެ ތެރޭގައި، މި މާއްދާގެ (ހ) ގެ ދަށުން ޢަދަދެއް ކަނޑައެޅެން ނެތް ކަމަށް ޤަބޫލުކުރެވޭ މަޤުބޫލު ޢުޛުރެއް އޮތްނަމަ، 3 (ތިނެއް) އަހަރު ދުވަހަށްވުރެ އިތުރުނުވާނެ ގޮތެއްގެމަތިން އެ މުއްދަތު އިތުރުކޮށްދިނުމަށް ޓެކްސް އެޕީލް ޓްރައިބިއުނަލްގައި މީރާއަށް އެދެވިދާނެއެވެ.

(ބ) މި މާއްދާގެ (ނ) ގައި އެހެން އޮތް ނަމަވެސް، މި ޤާނޫނަށް ޢަމަލުކުރަން ފަށާއިރު މި ޤާނޫނުގެ 30 ވަނަ މާއްދާގައި ބަޔާންކޮށްފައިވާ އެންގުން ޓެކްސް ދައްކާ ފަރާތަށް މީރާއިން ފޮނުވާފައިވާނަމަ، އަންނަނިވި ތާރީޚުތަކުގެ ތެރެއިން ފަހުން ބައްދަލުވާ ތާރީޚެއްގެ ކުރިން، އެ ފަރާތަކުން ދައްކަންޖެހޭ ޢަދަދު މި މާއްދާގެ (ހ) ގެ ދަށުން މީރާއަށް ކަނޑައެޅިދާނެއެވެ.

(1) މި ޤާނޫނުގެ 30 ވަނަ މާއްދާގައި ބަޔާންކޮށްފައިވާ އެންގުން ފޮނުވާ ތާރީޚުން ފެށިގެން 2 (ދޭއް) އަހަރު ހަމަވާ ތާރީޚު؛

(2) މި ޤާނޫނަށް ޢަމަލުކުރަން ފަށާ ދުވަހުން ފެށިގެން 120 (ސަތޭކަ ވިހި) ދުވަސް ހަމަވާ ތާރީޚު.

24. ބުނެވިދިޔަ ޤާނޫނުގެ 42 ވަނަ މާއްދާ އަންނަނިވި ގޮތަށް އިޞްލާޙުކުރުން.

42. އިއުތިރާޒުކުރުން

(ހ) ކޮމިޝަނަރ ޖެނެރަލް އޮފް ޓެކްސޭޝަން ނުވަތަ މީރާއިން ނިންމާ ނިންމުމަކާމެދު ޓެކްސް ދައްކާ ފަރާތުން އިއުތިރާޒުކުރާނަމަ އެ ނިންމުމެއް ނިންމި ތާރީޚުން ފެށިގެން 30 (ތިރީސް) ދުވަހުގެ ތެރޭގައި، އިއުތިރާޒުކުރާކަމުގެ އެންގުމެއް މީރާއަށް ހުށަހަޅަންވާނެއެވެ. މިގޮތުން ޓެކްސް ދައްކާ ފަރާތުން ހުށަހަޅާ އެންގުމަށް މި ޤާނޫނުގައި ޙަވާލާދޭނީ "އިއުތިރާޒުކުރާކަމުގެ އެންގުން" މިފަދައިންނެވެ.

(ށ) ޓެކްސްގެ ގޮތުގައި ދައްކަންޖެހޭ ކަމަށް މި ޤާނޫނުގެ 39 ވަނަ މާއްދާގެ (ހ) ގެ ދަށުން މީރާއިން ކަނޑައަޅާފައިވާ ޢަދަދާ ގުޅިގެން ނުވަތަ އެ ޢަދަދު ކަނޑައެޅުމުގައި މީރާއިން ޢަމަލުކޮށްފައިވާ ގޮތުން ޓެކްސް ދައްކާ ފަރާތުގެ އެއްވެސް ޙައްޤަކަށް އުނިކަން އައިސްފައިވާ ކަމަށް ޤަބޫލުކުރެވޭނަމަ އެ ކަމަކާ ގުޅިގެން ޓެކްސް ދައްކާ ފަރާތަށް އިއުތިރާޒުކުރާކަމުގެ އެންގުމެއް ހުށަހެޅިދާނެއެވެ.

(ނ) މި މާއްދާގެ (ހ) ގެ ދަށުން ހުށަހަޅާ އިއުތިރާޒުކުރާކަމުގެ އެންގުމުގައި، ކޮމިޝަނަރ ޖެނެރަލް އޮފް ޓެކްސޭޝަންގެ ނުވަތަ މީރާގެ ނިންމުމާމެދު ޓެކްސް ދައްކާ ފަރާތުން އިއުތިރާޒުކުރާ ސަބަބު ތަފްޞީލުކޮށް ބަޔާންކުރަންވާނެއެވެ.

25. ބުނެވިދިޔަ ޤާނޫނުގެ 43 ވަނަ މާއްދާ އަންނަނިވި ގޮތަށް އިޞްލާޙުކުރުން.

43. އިއުތިރާޒުކުރުމާމެދު މީރާއިން ގޮތެއް ނިންމުން

(ހ) ޓެކްސް ދައްކާ ފަރާތަކުން މި ޤާނޫނުގެ 42 ވަނަ މާއްދާގެ ދަށުން އިއުތިރާޒުކުރާ ކަމުގެ އެންގުމެއް މީރާއަށް ހުށަހަޅައިފިނަމަ، އެ އެންގުން ހުށަހަޅާ ތާރީޚުން ފެށިގެން 120 (ސަތޭކަ ވިހި) ދުވަހުގެ ތެރޭގައި އެ އެންގުމާމެދު މީރާއިން ގޮތެއް ނިންމަންވާނެއެވެ.

(ށ) މި މާއްދާގެ (ހ) ގައި އެހެން އޮތް ނަމަވެސް، މި ޤާނޫނަށް ޢަމަލުކުރަން ފަށާއިރު ޓެކްސް ދައްކާ ފަރާތަކުން މި ޤާނޫނުގެ 42 ވަނަ މާއްދާގެ ދަށުން އިއުތިރާޒުކުރާކަމުގެ އެންގުމެއް މީރާއަށް ހުށަހަޅާފައިވާނަމަ، އަންނަނިވި ތާރީޚުތަކުގެ ތެރެއިން ފަހުން ބައްދަލުވާ ތާރީޚެއްގެ ކުރިން، އެ އެންގުމާމެދު މީރާއިން ގޮތެއް ނިންމަންވާނެއެވެ.

(1) އިއުތިރާޒުކުރާކަމުގެ އެންގުން މީރާއަށް ހުށައެޅި ތާރީޚުން ފެށިގެން 120 (ސަތޭކަ ވިހި) ދުވަސް ހަމަވާ ތާރީޚު؛

(2) މި ޤާނޫނަށް ޢަމަލުކުރަން ފަށާ ދުވަހުން ފެށިގެން 60 (ފަސްދޮޅަސް) ދުވަސް ހަމަވާ ތާރީޚު.

(ނ) އިއުތިރާޒުކުރާ ކަމުގެ އެންގުމަކާ ގުޅިގެން މި މާއްދާގެ (ހ) އަދި (ށ) ގައި ބަޔާންކޮށްފައިވާ މުއްދަތުގެ ތެރޭގައި މީރާއިން ގޮތެއް ނުނިންމައިފިނަމަ، އެ އިއުތިރާޒުކުރުން ނިސްބަތްވާ މީރާގެ ނިންމުން ރަނގަޅު ނޫންކަމަށް، މީރާއިން ނިންމި ކަމުގައި ބެލެވޭނެއެވެ.

26. ބުނެވިދިޔަ ޤާނޫނުގެ 44 ވަނަ މާއްދާ އަންނަނިވި ގޮތަށް އިޞްލާޙުކުރުން.

44. އިސްތިއުނާފުކުރުން

(ހ) ޓެކްސް ދައްކާ ފަރާތަކުން ހުށަހަޅާ އިއުތިރާޒުކުރާކަމުގެ އެންގުމަކާ ގުޅިގެން މީރާއިން ނިންމާ ކޮންމެ ނިންމުމަކީ، ޓްރައިބިއުނަލްގައި އިސްތިއުނާފުކުރެވިދާނެ ނިންމުމެކެވެ. އަދި މިގޮތުން އިސްތިއުނާފުކުރެވޭނީ އިއުތިރާޒުކުރާކަމުގެ އެންގުމާ ގުޅިގެން މީރާއިން ގޮތެއް ނިންމާ ތާރީޚުން ފެށިގެން 30 (ތިރީސް) ދުވަހުގެ ތެރޭގައެވެ.

(ށ) ޓެކްސް ދައްކާ ފަރާތުން އިސްތިއުނާފުކުރަނީ މި ޤާނޫނުގެ 39 ވަނަ މާއްދާގެ ދަށުން މީރާއިން ކަނޑައަޅާފައިވާ ޓެކްސްގެ ޢަދަދަކާ ގުޅިގެން ކަމަށްވާނަމަ، އެ މައްސަލައެއް އިސްތިއުނާފުކުރެވޭނީ މީރާއިން ކަނޑައަޅާފައިވާ ޓެކްސްގެ ޢަދަދުގެ ތެރެއިން، ޓެކްސް ދައްކާ ފަރާތުން އިސްތިއުނާފުކުރާ ޢަދަދުގެ މަދުވެގެން %30 (ތިރީސް އިންސައްތަ) އާ އެއްވަރުގެ ޢަދަދެއް ދައްކައި ޚަލާޞްކުރުމަށްފަހުގައެވެ.

(ނ) މި މާއްދާގެ (ށ) ގައި ބަޔާންކޮށްފައިވާ %30 (ތިރީސް އިންސައްތަ) ހިސާބުކުރާނީ، އިސްތިއުނާފުކުރާ ޢަދަދާ ގުޅިގެން ދައްކަންޖެހޭ އެއްވެސް ޖޫރިމަނާއެއް ނުވަތަ އިންޓްރެސްޓަކާ ނުލައެވެ.

27. ބުނެވިދިޔަ ޤާނޫނުގެ 49 ވަނަ މާއްދާގެ ފަހަތަށް އަންނަނިވި ގޮތަށް މާއްދާއެއް އިތުރުކުރުން.

49-1. ލިބެންވާ ފައިސާ ހޯދުމުގައި ބޭރު ޤައުމުތަކުގެ އެހީ ހޯދުން

މީރާއަށް ދައްކަންޖެހޭ ޓެކުހެއް، ޖޫރިމަނާއެއް ނުވަތަ އެނޫންވެސް ފައިސާއެއް، މި ޤާނޫނުގެ 51 ވަނަ މާއްދާގެ ދަށުން ނުވަތަ މި ޤާނޫނުގެ 1-51 ވަނަ މާއްދާގެ ދަށުން ވެވޭ އެއްބަސްވުމެއްގެ ދަށުން ބޭރު ޤައުމެއް މެދުވެރިކޮށް ހޯދިދާނެއެވެ.

27. ބުނެވިދިޔަ ޤާނޫނުގެ ފަސްވަނަ ބާބުގެ ސުރުޚީ އަންނަނިވި ގޮތަށް އިޞްލާޙުކުރުން.

ފަސްވަނަ ބާބު

ޓެކްސް މުޢާހަދާތައް

29. ބުނެވިދިޔަ ޤާނޫނުގެ 51 ވަނަ މާއްދާގެ ފަހަތަށް އަންނަނިވި ދެ މާއްދާ އިތުރުކުރުން.

51-1. ޓެކުހާގުޅޭ މަޢުލޫމާތު ބަދަލުކުރުމުގެ އެއްބަސްވުން

ދިވެހިސަރުކާރާއި ބޭރު ޤައުމެއްގެ ނުވަތަ ޤައުމުތަކެއްގެ ސަރުކާރާއެކު ވެވޭ އެއްބަސްވުމެއްގެ ދަށުން، ޓެކްސް ދެއްކުމުން އެއްކިބާވުން ނުވަތަ ޓެކުހަށް މަކަރުހެދުން ހުއްޓުވުމަށާއި، އެފަދަ ކަންކަން ތަޙްޤީޤުކުރުމަށް ބޭނުންވާ މަޢުލޫމާތު، ޓެކްސް އިދާރާތަކުގެ މެދުގައި ބަދަލުކުރެވިދާނެއެވެ.

51-2. މުޢާހަދާއަށް ޢަމަލުކުރުން

(ހ) މި ޤާނޫނުގެ 51 ވަނަ މާއްދާ ނުވަތަ މި ޤާނޫނުގެ 1-51 ވަނަ މާއްދާގެ ދަށުން ވެވޭ އެއްބަސްވުންތަކަށް ދައުލަތުން ޢަމަލުކުރުމަށް ލާޒިމުވާނެއެވެ.

(ށ) މި މާއްދާގެ (ހ) ގައި ބަޔާންކުރާ ފަދަ އެއްބަސްވުންތަކަށް ޢަމަލުކުރުމަށްޓަކައި ދިވެހިރާއްޖޭގައި ޢަމަލުކުރެވޭ ޤާނޫނުތަކަށް ގެންނަންޖެހޭ ބަދަލުތައް ގެނައުމަކީ ދައުލަތުގެ ޒިންމާއެކެވެ.

30. ބުނެވިދިޔަ ޤާނޫނުގެ 54 ވަނަ މާއްދާގެ (ނ) ގެ ފަހަތަށް އަންނަނިވި ފަދައިން އަކުރެއް އިތުރުކުރުން.

54. (ރ) ޓްރައިބިއުނަލަށް ހުށަހެޅޭ މައްސަލައަކާ ގުޅިގެން ހުށަހަޅާ ޝަކުވާއަކީ ޞައްޙަ ޝަކުވާއެއް ކަމަށް ޓްރައިބިއުނަލަށް ފެނިއްޖެނަމަ، އަންނަނިވި އަމުރުތަކުގެ ތެރެއިން އަމުރެއް ނެރުމުގެ ބާރު ޓްރައިބިއުނަލަށް ލިބިގެންވެއެވެ.

(1) ވަކި ކަމެއް ކުރުމަށް ނުވަތަ ނުކުރުމަށް ކުރާ އަމުރު؛

(2) މި އަކުރުގެ (1) ވަނަ ނަންބަރުގައި ބަޔާންކުރާ ކަމަކާ ގުޅޭގޮތުން ވަކި ކަމެއް ކުރުމަށް ނުވަތަ ނުކުރުމަށް ކުރާ ވަގުތީ އަމުރު

31. ބުނެވިދިޔަ ޤާނޫނުގެ 55 ވަނަ މާއްދާ އަންނަނިވި ގޮތަށް އިޞްލާޙުކުރުން.

55. އިސްތިއުނާފުކުރުން

(ހ) ޓްރައިބިއުނަލުން ނިންމާ މައްސަލައެއް ނިންމާފައިވަނީ، ޝަރުޢީ އުސޫލަކާ ނުވަތަ ޤާނޫނާއި ގަވާއިދާ ޚިލާފަށް ކަމަށް ފެނިއްޖެ ހިނދެއްގައި، ނުވަތަ ޓްރައިބިއުނަލަށް ލިބިގެންނުވާ ބާރެއް ބޭނުންކޮށްގެންކަމަށް ފެނިއްޖެ ހިނދެއްގައި، އެ މައްސަލައެއް ނިންމާތާ 30 (ތިރީސް) ދުވަހުގެ ތެރޭގައި ޓްރައިބިއުނަލްގެ ނިންމުން އިސްތިއުނާފުކުރުމަށްޓަކައި ހައިކޯޓަށް ހުށަހެޅުމުގެ ޙައްޤު މީރާއަށާއި ޓެކްސް ދައްކާ ފަރާތަށް ލިބިގެންވެއެވެ.

(ށ) މި މާއްދާގެ (ހ) ގެ ދަށުން މައްސަލައެއް އިސްތިއުނާފުކުރި ނަމަވެސް، މަތީ މަރުޙަލާގެ ކޯޓަކުން ޓްރައިބިއުނަލުގެ އެ ނިންމުން ބަދަލުނުކުރާހާ ހިނދަކު ނުވަތަ ބާޠިލުނުކުރާހާ ހިނދަކު ނުވަތަ އެ ނިންމުމަށް ޢަމަލުކުރުން ފަސްކުރުމުގެ އަމުރެއް ނުނެރޭހާ ހިނދަކު، ޓްރައިބިއުނަލްގެ ނިންމުންތަކަކީ އެ މައްޗަށް ޢަމަލުކުރުން ލާޒިމު، އެންމެ ފަހުގެ ނިންމުންތަކެކެވެ.

32. ބުނެވިދިޔަ ޤާނޫނުގެ 84 ވަނަ މާއްދާ އަންނަނިވި ގޮތަށް އިޞްލާޙުކުރުން.

84. ޓެކްސް ރޫލިންގ

(ހ) މި މާއްދާގައި ބަޔާންކުރާ ދާއިރާގެ ތެރޭގައި، ކޮމިޝަނަރ ޖެނެރަލް އޮފް ޓެކްސޭޝަންއަށް ޓެކްސް ރޫލިންގ ނެރެވިދާނެއެވެ. އެގޮތުން ނެރޭ ޓެކްސް ރޫލިންގތަކަށް ޢަމަލުކުރުން، މީރާގެ މައްޗަށް ލާޒިމުވާނެއެވެ.

(ށ) ޓެކްސް ރޫލިންގއަކީ، ޓެކްސް ޤާނޫނާއި ގަވާއިދުތައް މާނަކުރުމުގައި މީރާއިން ޢަމަލުކުރާނެ އުސޫލުތައް ބަޔާންކުރުމަށްޓަކައި ނުވަތަ ވަކި ބާވަތެއްގެ މުޢާމަލާތަކާ ގުޅިގެން ޓެކްސް ދެއްކުމުގައި ޢަމަލުކުރަންޖެހޭ ގޮތް ބަޔާންކުރުމަށްޓަކައި، ނުވަތަ ޓެކްސް ނެގުމާގުޅޭ އިދާރީ ކަންކަން ބަޔާންކޮށްދިނުމަށްޓަކައި ނެރޭ ރޫލިންގއެކެވެ. އެއްވެސް ޙާލެއްގައި، އެފަދަ ޓެކްސް ރޫލިންގއެއް، މި ޤާނޫނާއި ޓެކްސް ޤާނޫނުތަކާއި އެ ޤާނޫނުތަކުގެ ދަށުން ހަދާ ގަވާއިދުތަކުގެ ދާއިރާއަށްވުރެ ފުޅާވެގެންނުވާނެއެވެ.

(ނ) މި މާއްދާގެ (ހ) ގެ ދަށުން ނެރޭ ކޮންމެ ޓެކްސް ރޫލިންގއަކަށް ޢަމަލުކުރަން ފެށުމަށް، މަދުވެގެން 30 (ތިރީސް) ދުވަހުގެ މުއްދަތެއް ދޭންވާނެއެވެ.

33. ބުނެވިދިޔަ ޤާނޫނުގެ 86 ވަނަ މާއްދާގެ (ހ) ގައި އެކުލެވޭ އަންނަނިވި މާނަކުރުންތައް އަންނަނިވި ގޮތަށް އިޞްލާޙުކުރުނ

86. "ޓެކްސް ޤާނޫނު" ކަމަށް ބުނެފައި އެވަނީ، މި ޤާނޫނު އަދި ޓެކްސް ނެގުމާބެހޭ އެންމެހައި ޤާނޫނުތަކަށެވެ.

"ޓެކްސް ދައްކާ ފަރާތް" ކަމަށް ބުނެފައި އެވަނީ، ޓެކްސް ޤާނޫނެއްގެ ދަށުން ރަޖިސްޓަރީކުރަންޖެހޭ ފަރާތަށެވެ.

"ޓެކްސް ބަޔާން" ކަމަށް ބުނެފައި އެވަނީ، ޓެކްސް ޤާނޫނެއްގެ ދަށުން ހުށަހަޅަންޖެހޭ ބަޔާނާއި އެ ބަޔާނާއެކީ ހުށަހަޅަންޖެހޭ ލިޔެކިޔުންތަކަށެވެ.

34. ބުނެވިދިޔަ ޤާނޫނުގެ 86 ވަނަ މާއްދާގެ (ހ) ގައި އެކުލެވޭ، ތިރީގައި ނަކަލުކޮށްފައިވާ "ޓެކްސްއާބެހޭ ޤާނޫނު" ގެ މާނަކުރުން އުނިކުރުން.

86. (ހ) "ޓެކްސްއާބެހޭ ޤާނޫނު" ކަމަށްބުނެފައި އެވަނީ، މިޤާނޫނު އަދި ޓެކްސް ނެގުމާބެހޭ އެންމެހައި ޤާނޫނުތަކަށެވެ.

35. ބުނެވިދިޔަ ޤާނޫނުގައި "ޓެކްސްއާބެހޭ ޤާނޫނު" މިފަދައިން ބަޔާންކޮށްފައިވާ އެންމެހައި ޢިބާރާތްތައް، "ޓެކްސް ޤާނޫނު" އަށް ބަދަލުކުރުން.

36. މި ޤާނޫނަށް ޢަމަލުކުރަން ފަށާތާ ގިނަވެގެން 30 (ތިރީސް) ދުވަހުގެ ތެރޭގައި، ބުނެވިދިޔަ ޤާނޫނުގެ 4 ވަނަ މާއްދާގެ (ރ) ގެ (1) ވަނަ ނަންބަރުގެ ދަށުން މީރާގެ ބޯޑަށް ޢައްޔަންކުރާ ފަރާތް، ޢައްޔަންކުރަންވާނެއެވެ.

37. ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) އަށް 2 ވަނަ އިޞްލާޙު ގެނައުމުގެ ޤާނޫނަށް ޢަމަލުކުރަން ފަށާ ތާރީޚުން ފެށިގެން 30 (ތިރީސް) ދުވަހުގެ ތެރޭގައި، ބުނެވިދިޔަ ޤާނޫނުގެ 8 ވަނަ މާއްދާގެ ދަށުން ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އަލުން މީހުން ޢައްޔަންކުރަންވާނެއެވެ.

38. މި ޤާނޫނަށް ޢަމަލުކުރަން ފަށާނީ، މި ޤާނޫނު ފާސްވެ، ތަޞްދީޤުކޮށް، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެންނެވެ.